ما تيجوا نروح شلال الفردوس
كتبت-خلود أحمد
معظمنا لما كان بيحب حد يوعده بحاجة كان بيقوله " شاور ع قلبك" كنا دايماً بنشوف إ"يلين" وهي عايزة "كارل "يوعدها بحاجة تقوله " شاور ع قلبك شاور ..شاور عليه أديك وعدت مترجعش ف كلامك" طب ليه بنحب نخليهم يشاوروا ع قلبهم؟
دايماً بيكون فيه علاقة بالقلب والوعد لإننا عارفين إن أصدق حاجة ف حياة الشخص هي قلبه، عشان كدا بنقول شاور ع قلبك ومعناها بالنسبالنا اوعدني بأكتر حاجة صادقة جواك، وأكتر حاجة عارفين انها مهمة عند كل شخص عشان كدا لازم تشاور ع قلبك طول ما انت بتوعد بصدق.
واحنا صغيرين كنا بنحب نتابع استاذ" فريد زين" اللي كان بيحب إيلين أوي بس إيلين كان نفسها تروح " شلال الفردوس" أو اللي كانت اسمها" الأرض الضائعة"، وكانت عايزة تروح هناك بمنطاد بس هي كانت معندهاش إلا صورة بس "لشلال الفردوس" وكانت موجودة ف كتاب مغامراتها، آه ماهو ايلين كان عندها كتاب مغامرات ومش بس كدا، كانت من المكتشفين وكانت عارفة إن مش أي حد لابس نضارة وخوذة يبقى مستكشف.
فضلت ايلين تحلم باليوم اللي هتروح فيه"شلال الفردوس" وساعتها تكون حققت هدفها ووصلت "للأرض الضائعة" وتكون ختمت كل مغامراتها وسجلتهم في كتاب مغامراتها.. ومش بس هي اللي كان عايز يروح شلال الفردوس ده " كارل" كمان كان اكتر حد داعم ليها وحب إن حتى بعد ما يكبروا ويتجوزوا يكونوا سوا عند شلال الفردوس.
.
لما ماتت إيلين كان موتها سبب كافي إن استاذ فريد يصمم إنه يروح "شلال الفردوس" عشان ينفذ وعده لإيلين وده اللي حصل فعلاً بس.. ف يوم جه لأستاذ فريد طفل صغير من مغامرين الكشافة كان اسمه" رامز" وكان فاضله شارة مساعدة الناس المسنة او زي ما بنقول الناس اللي سنها كِبر وكان لازم يحصل ع الشارة عشان يبقى من اكبر مغامرين الكشافة.
طب ياترى هيقدر يساعد استاذ فريد عشان يوصل لشلال الفردوس؟
بيت استاذ فريد كان مصممه جزء جزء هو وزوجته إيلين عشان كدا مكنش بيحب أي حاجة تتغير سواء جوا أو برا البيت وده كان سبب ف إنه يحاول يدافع عن جزء من برا البيت وللأسف يطلبوا إنه يروح دار لرعاية كبار السن، بس يوم تنفيذ القرار حصل معجزة غريبة شوية تيجوا نشوف إيه هي.
جهز استاذ فريد كل حاجة خاصة برحلته الجديدة بس مش لدار المسنين لا لشلال الفردوس، قرر استاذ فريد إنه يروح بروح وكل حاجة خاصة بإيلين لشلال الفردوس عشان يحقق رغبة ايلين بس كان محتاج إنه يروح هناك بمنطاد.. طبعاً اللي حابب يعمل حاجة ف اكتر الوقت بتكون صح وعشان كدا " فريد" خلى البيت هو المنطاد اللي هيروح بيه لشلال الفردوس عشان يستكشف الأرض الضائعة وشوفي بوعده لإيلين.
حاول فريد إنه يوصل بأكتر من طريقة لشلال الفردوس وفعلاً وصل حقق حلم ايلين ووفى بوعده إنه " يوديها هناك بمنطاد"، طب إيه الغرض بتاع ديزني من إنها تعرض الفيلم لو بصينا لغرض الفيلم ده هنشوف أنه بيعلمنا حاجات كتير أوي أولهم اننا لازم تكون حياتنا فيها مغامرات كتير ماهي أصل الحكاية هتحلى ازاي من غير مغامرة؟ وكمان إن الوعد ممكن يتحقق مش مجرد كلام وبس لا الوعد أحياناً بنفضل متمسكين بيه عشان ف يوم نقول حققنا الوعد، وكمان بيعلمنا إننا لازم نشاور ع قلبنا مش قلبنا احياناً بيحكم بصدق!.
تعليقات
إرسال تعليق